2023 онд иргэдээс ирүүлсэн өргөдөл гомдлын шийдвэрлэлтийн тайлан
2023 ОНд ДОРНОГОВЬ АЙМГИЙН ТӨРИЙН БАЙГУУЛЛАГА,
АЛБАН ТУШААЛТАНД ХАНДАЖ ИРГЭДЭЭС ИРҮҮЛСЭН
ӨРГӨДӨЛ, ГОМДЛЫН ШИЙДВЭРЛЭЛТИЙН ТАЙЛАН
2024.01.15. Сайншанд
Дорноговь аймгийн Засаг дарга, түүний Тамгын газарт иргэдээс ирүүлсэн өргөдөл, гомдол, санал хүсэлтийг "Иргэдээс төрийн байгууллага, албан тушаалтанд хандан гаргасан өргөдөл, гомдлыг шийдвэрлэх тухай" хууль, хуулийн хэрэгжилтийг зохион байгуулахтай холбогдон гарсан зарим арга хэмжээний тухай Монгол Улсын Засгийн газрын 2005 оны 67 дугаар тогтоол, аймгийн Засаг даргын Тамгын газарт ирсэн өргөдөл, гомдол, санал хүсэлтийг хянан шийдвэрлэх тухай журмын хүрээнд шийдвэрлэн ажиллалаа.
Аймгийн нутгийн захиргааны байгууллага, албан тушаалтанд хандаж иргэдээс ирүүлсэн өргөдөл, гомдлыг хүлээн авч, шуурхай шийдвэрлэх ажлыг зохион байгуулах, үр дүнг тооцох, аймгаас гарах бодлого, шийдвэрт иргэдийн санал бодлыг тусгах, нээлттэй, шуурхай, ил тод байдлыг хангах зорилгоор нийт сумдад иргэдийн санал, хүсэлт, гомдол, мэдээллийг хүлээн авах нээлттэй утас ажиллуулж, аймгийн "Төрийн үйлчилгээний төв"-д 7052-3737, аймгийн Засаг даргын Тамгын газарт 7052-1111 тусгай дугаарын утас тус тус ажиллуулж байна.
Эдгээр шууд утсаар 146, байгууллагын цахим хаягаар 41 иргэний санал хүсэлтийг хүлээн авч шийдвэрлэх үйл ажиллагааг зохион байгуулжээ. Мөн сумдын "Төрийн үйлчилгээний нэгдсэн төв"-өөр дамжуулан 1103 иргэний санал, хүсэлтийг тус тус хүлээн авч шийдвэрлэн ажиллалаа.
Монгол Улсын Засгийн газрын иргэд, олон нийттэй харилцах “11-11” төвөөс шилжиж ирсэн 281 өргөдөл гомдлыг хүлээн авсны 82,3 хувийг 1-30 хоногт шийдвэрлэж хариуг зохих журмаар өгсөн бөгөөд 26 өргөдөл гомдлын шийдвэрлэх хугацаа хэтэрч, бусад нь судлагдаж байна.
Аймгийн Засаг дарга, түүний Тамгын газарт хандаж нийт 587 өргөдөл, гомдол ирснээс бичгээр 213, Аймгийн Засаг даргын Тамгын газрын иргэдийн санал хүсэлт хүлээн авах 7052-11-11 утсаар 8, http://dornogovi.gov.mn/ сайт хаягаар 5, Засгийн газрын иргэд олон нийттэй харилцах 11-11 төвөөр дамжуулан 271 өргөдөл, гомдол хүлээн авч судлан шийдвэрлэж байна.
2023 онд бүх сумын Засаг даргын Тамгын газар, агенлагийн өргөдөл, гомдол хариуцсан ажилтнуудад танхимын сургалт нэг удаа, цахим сургалтыг нэг удаа зохион байгуулж, 8 сумын Засаг даргын Тамгын газар, 8 агентлагийн өргөдөл гомдол хариуцсан ажилтнуудад нэг бүрчилсэн зааварчилга, арга зүйн зөвлөгөө өглөө.
Иргэд олноор үйлчлүүлдэг аймгийн төвийн 12 агентлаг, байгууллагад өргөдөл гомдол хүлээн авах саналын хайрцаг байрлуулж иргэдийг хүлээлгэхгүйгээр тэдний санал хүсэлтийг хүлээн авч шийдвэрлэж байна.
Тайлант хугацаанд тус аймгийн нутгийн захиргааны байгууллага, албан тушаалтан нийт 6348 өргөдөл, гомдол, санал, хүсэлт хүлээн авснаас 5744-ийг хуулийн хугацаанд шийдвэрлэн хариуг өгч, 604 өргөдөл гомдол судлагдаж байгаа болон шийдвэрлэх хугацаа хэтэрсэн байна.
Эдгээрээс аймгийн Засаг дарга, түүний Тамгын газарт хандан нийт 587 өргөдөл ирснээс 385 өргөдлийг 3-28 хоногийн хугацаанд шийдвэрлэсэн бөгөөд 62 өргөдөл судлагдах шатандаа, 35 өргөдлийг холбогдох байгууллагад шилжүүлсэн байна. Эдгээрийн 81.4 хувийг хугацаанд нь шийдвэрлэсэн байна.
Сумдын Засаг дарга түүний Тамгын газрууд нийт 4821 өргөдөл, гомдол хүлээн авч эдгээрийн 94.5 хувийг хуулийн хугацаанд шийдвэрлэж 154 нь судлагдах шатандаа байна,
Агентлаг, байгууллагууд нийт 1156 өргөдөл санал хүлээн авч 93,2 хувийг хуулийн хугацаанд шийдвэрлэж хариуг зохих журмаар өгсөн байна.
Аймгийн удирдлага 275 иргэнийг өөрийн биеэр хүлээн авч уулзан санал, гомдол, хүсэлт, мэдээллийг сонсож хууль тогтоомжийн дагуу шийдвэрлэсэн.
Иргэдээс нутгийн захиргааны байгууллага, албан тушаалтанд хандаж ирүүлсэн өргөдөл, гомдлын шийдвэрлэлтийн өмнөх улирлын тайланд тусгагдан хугацаа болоогүй судлагдаж байсан 157 өргөдлийг шийдвэрлэж, хариу өгчээ.
2023 онд иргэдээс ирүүлсэн нийт өргөдлийн 4590 нь мэдэгдэл, гомдол, санал хүсэлт, 1758 байгууллагын дотоод асуудал, үйлчилгээ авах хүсэлтүүд байлаа.
Эдгээрээс 4177-г бичгээр, 281-г засгийн газрын 11-11 төвөөр дамжуулан, 41-г вэб сайт, сошиал платформ, и-мэйл ашиглан цахимаар, утсаар 83 өргөдөл, хүсэлт гаргажээ.
2023 онд төрийн байгууллага албан тушаалтны шийдвэр, үйл ажиллагаагаар иргэдийн хуулиар хамгаалагдсан эрх чөлөө, ашиг сонирхол зөрчигдсөн гэж үзэж сэргээлгэхээр гаргасан гомдол, мэдээлэл 190 /өмнөх онд 91 байсан/ байгаагаас:
1.Аймаг, сумын Засаг даргын Тамгын газар /Мэргэжлийн салбарын хяналт, татвар, Улсын бүртгэлийн байгууллагатай холбоотой/ - 39, /2022 онд 32 байсан/ 21,8%-иар өссөн,
2.Хил хоорондын ачаа, зорчигч тээвэрлэлттэй холбоотой – 37, /өмнөх онд 8 байсан/ 462,5%-иар өссөн,
3.Эрүүл мэндийн байгууллагын үйл ажиллагааны зарим доголдол, эмч ажиллагсдын ажлын хариуцлага, ёс зүйтэй холбогдох гомдол – 32, /өмнөх онд 20 байсан/ 60,0%-иар өссөн,
4.Цагдаагийн байгууллагын албан хаагчтай холбоотой 31, /2022 онд 14 байсан/ 121,4%-иар өссөн,
5.Хөдөлмөр, халамж үйлчилгээтэй холбоотой – 15, /өмнөх онд 7 байсан/ 114,2%-иар өссөн,
6.Иргэдийн эрчим хүч, ус дулаан хангамжтай холбоотой – 10, /өмнөх онд 6 байсан/ 66,6% -иар өссөн,
7.Ерөнхий боловсролын сургуулийн үйл ажиллагаатай холбоотой 8, /өмнөх онд 5 байсан/ 60,0%-иар өссөн,
8.Сургуулийн өмнөх боловсрол олгох байгууллагатай холбоотой – 4, /2022 онд 4 байсан/ 0%
9.Хилийн боомт, гаалийн үйл ажиллагаатай – 6, /өмнөх онд 2 байсан/ 200,0% -иар өссөн,
10.Газар харилцаатай холбоотой – 5, /2022 онд 5 байсан/ 0%
11.Шүүхийн шийдвэр гүйцэтгэлтэй холбоотой – 3, /өмнөх онд 1 байсан/ 200% -иар өссөн дүнтэй байна.
2023 онд иргэдээс төрийн байгууллага, албан тушаалтанд хандаж гаргасан өргөдөл, гомдлын тоо өмнөх оны мөн үеэс 133-аар буюу хоёр дахин өссөн байна.
Өргөдөл, гомдлыг шийдвэрлэхдээ хаахдаа өргөдөл гомдолд дурдагдсан асуудал яаж шийдвэрлэгдсэн, өргөдөл гаргагчийн гомдол, хүсэлт хэрхэн хангагдсан, хангагдаагүй бол ямар хууль тогтоомжийн заалтын дагуу хангах боломжгүй байгааг тодорхой дурдаагүй, өргөдөлд дурдсан асуудлыг давтах, үйл явцыг тоочих, ерөнхий тайлбар бичих зэргээр өргөдөл гаргагч болон хяналт тавьж байгаа албан тушаалтанд ойлгомжгүй тохиолдол давтагдаж байна. Өргөдөл, гомдлын хариуг цаг хугацаанд нь ойлгомжтой тодорхой өгөөгүйгээс өргөдөл гаргагч дараа дараагийн шатанд гомдол, мэдээлэл гаргах явдал гарсан байна. 2023 онд 9-н иргэн тодорхой нэг асуудлаар 2-3 удаа өргөдөл гаргасан байна. Эдгээр нь:
- Хил гааль, ачаа тээвэрлэлттэй холбоотой – 4,
-Эмнэлгийн байгууллагын үйл ажиллагаатай холбоотой – 2,
- Цагдаагийн байгууллагатай холбоотой - 2,
- Мэргэжлийн салбарын хяналт, ариун цэвэр, эрүүл ахуйтай холбоотой -1 байна.
Тайлант хугацаанд иргэдээс төрийн байгууллага, албан тушаалтанд хандаж гаргах өргөдөл, гомдол өсөн нэмэгдэж байгаад дүн шинжилгээ хийж Монгол Улсын Ерөнхий сайдын 2022 оны 214 дүгээр захирамжаар батлагдсан удирдамжийн заалт, аймгийн Засаг даргын 2022 оны 12 дугаар сарын 09-ний өдрийн А/730 дугаар захирамжийг өөрийн сум, агентлагт хэрэгжүүлж ажиллахыг холбогдох албан тушаалтнуудад үүрэг болгон ажиллаа.
2024 онд дараах асуудалд анхаарч ажиллахаар төлөвлөж байна.
-Дорноговь аймгийн төрийн байгууллага албан тушаалтнаас төрийн үйлчилгээ авсан иргэдийн эрх ашгийг зөрчсөн гэж үзэж хуулиар хамгаалагдсан эрх чөлөө, ашиг сонирхлоо сэргээлгэхээр гомдол, санал гаргасан хүсэлтийг салбар, байгууллага, албан тушаалтан бүрээр нарийвчлан судлах
-Аймгийн ЗДТГ, сум, агентлаг байгууллагуудаас иргэний өргөдөл гомдлыг шийдвэрлэж буй байдал, иргэний сэтгэл ханамжийн байдалд тус бүр аймгийн ЗДТГ-ын Хяналт шинжилгээ, үнэлгээний хэлтсээс хариуцсан ажлын хэсэг гарган улирал бүр дүн шинжилгээ хийж холбогдох байгууллага, албан тушаалтанд хариуцлага тооцох, үүрэг чиглэл, зөвлөмж өгөн ажиллах
-Судалгаа болон хяналт шинжилгээ, үнэлгээний дүнд үндэслэн тухайн салбар, байгууллага, албан хаагчийн жил улирлын гүйцэтгэлийн төлөвлөгөөнд тусгуулан өөрийн чиг үүргийн хүрээнд хэрхэн шийдвэрлэж хэрэгжүүлсэн хэрэгжилтийг дүгнэн үр дүнг тооцох,
-Агентлаг, сумдын тухайн асуудлыг хариуцсан ажилтнууд өргөдөл, гомдлын бүртгэл, ангиллыг тодорхой хийж гүйцэтгэх, энэ мэдээлэлд үндэслэн сум, агентлаг, байгууллагын удирдлага эсвэл хөгжлийн бодлого төвлөвлөлт, хүний нөөцийн асуудал хариуцсан ажилтан хүлээн авсан өргөдөл, гомдолд судалгаа дүгнэлт хийж, үр дүн, үр нөлөөг тооцож ажиллах,
-Иргэдээс төрийн байгууллага, албан тушаалтанд хандан гаргасан өргөдөл, гомдлыг шийдвэрлэх тухай хуулийн шинэчилсэн найруулгын төслийг судалж, хэлэлцүүлэг явуулан санал өгч ажиллах.
-Төрийн байгууллагын үндсэн үйл ажиллагаатай холбогдох иргэний өргөдөл, хүсэлт болон байгууллагын дотоод ажил үйлчилгээтэй холбоотой ажилтны гаргасан өргөдлийг энэхүү хуулийн хэрэгжилтийн хүрээнд гаргах өргөдөл, гомдлын тайланд тусгахгүй байх чиглэлийг дахин байгууллагуудад өгч тайлан мэдээний тооны үнэн зөв байдалд онцгойлон анхаарч ажиллах
-Төрийн албан хаагчийн ёс зүйн тухай хуулийн хүрээнд төрийн албан хаагчтай холбоотой ёс зүйн зөвлөл, хороонд гаргасан өргөдөл гомдлын шийдвэрлэлтийг энэхүү хуулийн хүрээнд тайлагнах уу, төрийн албаны зөвлөлд тайлагнагдах уу, тоон давхардлыг арилгах чиглэлээр зөвлөмж чиглэл өгч нэг мөр ойлголттой болж хэрэгжүүлэхэд анхаарч ажиллах
Аймгийн засаг даргын Тамгын газар